Үҙгәрештәр һоҡландыра

Ҡаланың үҙәк майҙанында ла Мәләүез йылғаһы яры буйында төҙөлөш гөрләй башланы Ҙур саралар үткәрелгән сәхнә янындағы асфальтты ауыр техника аҡтарып ала башлағас, кешеләрҙең ҡыҙыҡһыныуын ҡәнәғәтләндерер, эш күләмен белеү маҡсатында ҡала хужалығы секторы мөдире Алһыу Ковинскаяға мөрәжәғәт иттек. Белгес әйтеүенсә, бәләкәй ҡалалар араһында үткәрелгән “Ҡайын тракты” федераль конкурсында йылға ярҙарын төҙөкләндереү проекты менән Мәләүез еңеп сыҡҡан. Шул иҫәпкә Ленин урамынан Шлычков урамына тиклемге 5,3 гектар майҙанда яр буйҙарын төҙөкләндереү ҙә биләмәнең тәбиғәт потенциалын күрһәтеүгә йүнәлтелгән. Проектҡа ярашлы, алты зона: ҡалала йәшәүселәрҙең яратҡан ял, төрлө саралар уҙғарыу урыны, балалар майҙансығы, спорт менән шөғөлләнеү, сауҙагәр Баязитовтың мәҙәни мираҫ объекты, хакимиәт бинаһы янында йәйәүлеләр өсөн зона билдәләнгән. Яр буйында күләгәлә ял итергә яратыусыларҙы тынысландырабыҙ: ундағы ағастар, бар матурлыҡ һаҡланасаҡ, йылғалағы бәләкәй суднолар туҡтар өсөн ҡоролмалар (пирс), мини-пляж төҙөләсәк.