Кәйефебеҙ улар хеҙмәтенә бәйле

- 2010 йылда ни бары ике йорт менән идара итеүҙән башланған эшмәкәрлек - бөгөн үҫеш юлында, беҙҙең ҡарамаҡта 41 күп фатирлы йорт иҫәпләнә. Улар ҡаланың төрлө урамдарында урынлашһа ла, милекселәргә үҙ хеҙмәтебеҙҙе ваҡытында күрһәтәбеҙ. Ҡарҙың башҡа йылдарҙан айырмалы күпләп яуыуы тармаҡта ауырлыҡтар тыуҙырмай ҡалманы, әлбиттә, әммә ҡыҫҡа ваҡыт арауығында тәжрибә тупларға өлгөргән татыу коллектив өсөн был ҡаршылыҡ түгел. Ҡыштың беренсе айында ҡыйыҡтарҙы, юлдарҙы таҙартыуға ҙур иғтибар бүлдек, байрам осоронда өҙлөкһөҙ эшләнек. Хәүефһеҙлек шарттарына ярашлы, һауа температураһы йыш алмашыныуға бәйле ҡыйыҡтарҙа барлыҡҡа килгән боҙбармаҡтарҙан таҙартыуға альпинистарҙы йәлеп итәбеҙ. Тап беҙҙең компанияға ҡараған йорттар алдындағы машина ҡуйыу урындары, балалар майҙансыҡтары, тротуарҙар таҙалығына иғтибарығыҙҙан ситтә ҡалмайҙыр.