Белем көнөндә спиртлы эсемлектәр һатыу тыйыласаҡ

Бындай сара республикала беренсе тапҡыр индерелә.

Башҡортостан Дәүләт йыйылышы - Ҡоролтай Рәйесе Константин Толкачев быйыл беренсе тапҡыр Белем көнөндә республикала спиртлы эсемлектәр һатыу тыйыласағы тураһында еткерҙе. Быйыл 1 сентябрь ял көнөнә тура килеү сәбәпле, уҡыусылар һәм студенттар өсөн уҡыу йылы 2 сентябрҙән башлана.

- Республика халҡына шуны еткерге килә: быйылдан башлап Белем көнө алкоголһеҙ байрам ителәсәк. Республика буйынса, һыраны ла индереп, спиртлы эсемлектәр һатыу тыйыласаҡ, - тине Константин Толкачев. - Был сара тәртип боҙоусыларға юл ҡуймаҫ өсөн эшләнә. Йәштәр араһында спиртлы эсемлектәр ҡулланыуҙың кәмеүенә лә өмөтләнәбеҙ.