Бар кешегә тигеҙ мөмкинлектәр

Халыҡ иҫәбен алыуҙа ҡатнашыу һәр кемдең гражданлыҡ бурысы. Шәхси мәғлүмәт талап ителмәй. Хеҙмәт кенәгәһен, йортҡа таныҡлыҡ, диплом, паспорт һәм башҡа документтарҙы бер кем дә һорамаясаҡ. Шәхесте, милекте, тереклекте дәлилләү кәрәкмәй - граждандың һүҙҙәренән генә яҙып алына. Ә йыйылған мәғлүмәт таратылмай, тулы йәшеренлек тәьмин ителә.

Илдә йәшәгәндәр һаны, милли составы киләһе йылдарға социаль-иҡтисади тормошто күҙаллау һәм көйләү өсөн кәрәк. Рәсәй Президенты Владимир Путин Федераль Йыйылышҡа Мөрәжәғәтнамәһендә властың төп бурысын аныҡ билдәләне: бар кеше өсөн юғары тормош стандарттары, тигеҙ мөмкинлектәр булдырыу. Ватанды үҫтереү пландары тап ошо маҡсатҡа ирешеүгә йүнәлтелергә тейеш.