Арып киттегеҙме әллә?..

Айнытҡыстар айнырға ярҙам итерме икән? Әҙәм балаһының ер йөҙөндә көндәре һанаулы, ана шул ғүмерҙе лайыҡлы үтеү өсөн башың айыҡ, күҙең асыҡ булыу зарур. Ҡыҙғанысҡа ҡаршы, илдә төрлө саралар күрелһә лә, эскелек кәмемәй. Дәүләт Думаһы депутаттары иҫке һөҙөмтәле сараны яңыртыу тураһында закон ҡабул итте. Совет осоронда киң билдәле айнытҡыстар системаһын тергеҙергә хәл ителде. Унда әйтелгәнсә, урындағы властарҙың «йәмәғәт урындарында иҫерек йөрөгән кешеләргә ярҙам күрһәтеү» вәкәләте барлыҡҡа килә, шул иҫәптән төбәктәргә махсус учреждениеларҙың эшмәкәрлеген ойошторорға кәрәк. Айнытҡыстар дәүләт-шәхси һәм муниципаль-шәхси партнерлыҡ тураһында килешеүҙәр нигеҙендә булдырыла. Һаулыҡ һаҡлау, Хеҙмәт һәм Эске эштәр министрлыҡтары ошондай учреждениеларҙың эшмәкәрлеген ойоштороу ҡағиҙәләрен әҙерләргә тейеш.