Ҡабаҡ үҫтереү хикмәттәре

Ҡыҙрай ауылында башланғыс кластар уҡытыусыһы Венера Күзбәкованың баҡсаһында ғәжәйеп ҙур ҡабаҡтар үҫкән. Йәшелсә орлоғон яҙын картуф баҡсаһында сәскән. “Ямғырҙа дымланып иҙрәгән йомшаҡ тупраҡҡа төртөп сыҡтым да, оноттом тиергә була. Өфөлдәп эргәһендә торманым, ул үҙе үҫте”, - ти хужабикә. Картуф һабағын сабырға салғыһын тотоп , тормош иптәше Мансур Талха улы, баҡсаға сыҡҡан, ғәжәпләнеп, үҙен дә саҡырып сығара. “Барып ҡараһаҡ, эре-эре ҡабаҡ тәгәрәшеп ята! Үҙҙәре күтәрә алмаҫлыҡ ғәләмәт ҙурҙар, әкиәттәге кеүек матурҙар! Ҡул арбаһына икәүләп күтәреп һалып, саҡ өйгә ташып бөтөрҙөк”, - ти Венера Ғилметдин ҡыҙы. Күтәрә алырлыҡтарын туғандарына биргәндәр.