Үксәлә шпора борсоһа

Үксәлә үҙәккә үтерлек ауыртыу йонсотһа, ошо ысулды ҡулланып ҡарарға була. Һыҙланыу шпора барлыҡҡа килеүҙән булыуы ихтимал.

Тауыҡ йомортҡаһын стаканға һытып, өҫтөнә 100 грамм һеркә ағыҙалар һәм ҡатнашманы ҡараңғы, һалҡынса урынға ҡуялар. 3-4 көн торғандан һуң йомортҡаны һеркәнән алып, уның йоҡа элпәһен тишеп, ағын ағыҙып алалар. Ә йомортҡа һарыһын айырым һауытҡа һалып, күбекләнгәнсе болғаталар. Уға 100 грамм скипидар һәм стакан төбөндә ҡалған һеркәле шыйыҡсаны аҙ-аҙлап ҡына ҡушалар һәм әҙер ҡатнашманы ҡара төҫтәге шешәгә ағыҙып, ҡараңғы урынға һаҡларға ҡуялар.

Шпораны кис көнө дауаларға кәрәк. Иң элек диңгеҙ тоҙо һалып иретелгән ярты литр һыу әҙерләйҙәр. Аш тоҙо ҡулланырға ла ярай. Йылы һыу менән ауыртҡан урынды йыуып, таҫтамал менән яҡшылап ҡороторға. Ҡатнашма һөртөлгән шпораны йөн туҡыма менән ҡаплап, йылы компресс ҡуйып төнгөлөккә ҡалдыралар. Был процедураны дауаланып бөткәнсе (7-10 тапҡыр) ҡабатларға кәрәк.