Конгэк
-21 °С
Болотло
75 лет Победы
Бөтә яңылыҡтар
Йорт усағы
3 Июль 2020, 13:50

Ишеткәнең бармы?

Бер нәмәгә лә аптырарға ярамай

Кемде лә булһа оҙатҡас, өйгә буш ҡул менән инһәң - юлға сыҡҡан кешенең юлы уңмай. Бер ҡосаҡ утын булһа ла күтәреп инергә кәрәк.
- Сәфәргә киткән кеше күрешмәй китһә - тиҙ әйләнеп ҡайтып күрешеүгә, ти.
- Юлға сығыусы өйҙә үҙенең һынығын ҡалдырһа - тиҙ әйләнеп ҡайта.
- Сәфәргә китеүсенең артынан уҡ иҙән һеперергә ярамай.
- Юлға сығыр алдынан күнәктәргә мөлдөрәмә итеп һыу тултырып ҡуйһаң - юлың уңа.
Тупһаға, ишек башына даға ҡағыу йолаһы бар. Кешенең яман уйы, яман һүҙе шул дағаға эләгеп ҡала, тип һанала.
Даға ен-шайтандарҙан да һаҡлай.
Уны ҡаҡҡан саҡта:
Шайтан килмәһен өсөн,
Хәрәм кермәһен өсөн,
Тел-теш баҫмаһын өсөн,
Бәрәкәт ҡасмаһын өсөн, -
тип һамаҡлайҙар. Даға ат тояғынан төшөп ҡалған булырға тейеш, сөнки ҡатынан да ҡаты - ат тояғы ҡаты, тип һаналған.
- Ватыҡ көҙгөгә ҡарарға ярамай, күңелең китек булыр.
- Кешегә ҡаты бәрелмә, күңелен рәнйетеп ҡуйыуың бар. Рәнйеш ҡарғыштан да яман.
- Бер нәмәгә лә аптырарға ярамай, нимәгә аптырайһың – алдыңа шул килә.
Фото асыҡ сығанаҡтан.