+30 °С
Болотло
Яҙмыш. Тормош. Булған хәл
22 Октябрь 2025, 05:02
МИНЕ ӨЙ ЭЙӘҺЕ УЯТТЫ
Өй, һарай, мунса эйәһе була тигәндәрен күп ишеткәнем бар. Тик бер нәмәгә лә ышанманым, ышанған кешеләрҙән көлә генә инем. Йәш саҡта эштән аҙыраҡ “ҡырын тейәп”ҡайтып, кәләш индермәгәндә күпме һарайҙа йәки мунсала йоҡлағаным булды. Күренер булһа, шунда күренер ине тип уйлай торғайным. Былтыр иманымды уҡытҡан бер хәл булды әле. Ҡыҙыбыҙ дауаханаға ятҡас, ҡатын ейәндәрҙе ҡарашырға ҡалаға киткәйне, өйҙә бер үҙем ҡалдым. Быға тиклем дә яңғыҙым аҙналап йәшәгәнем булды, әммә бер ҙә ҡурҡмай инем. Был юлы тәүге көндө үк күңелде ниндәйҙер шом баҫты. Кемдер йөрөгән һымаҡ, сыҡһам – тышта, инһәм өйҙә мине күҙәткән кеүек. Ҡурҡыуын да ҡурҡмайым, әммә бер үҙем түгеллегемде аңлағас, нисектер шөрләтә.
МИНЕ ӨЙ ЭЙӘҺЕ УЯТТЫ
Бер көн төндә “Нимә ҡарап ятаһың, танаң ауырый бит. Бар сыға һал, ҡара!”- тигән тауышҡа уянып киттем. Ҡатынымдың тауышы. Алғы яҡта ут яна. Ҡайта һалып, мине уятып, һарайға сығып киткәндер, тип уйланым башта. Тиҙ генә бишмәтте кейҙем дә йүгереп сыҡтым. Һарай ишеге асыҡ. Унда ла ут яна. Асыҡтан ишектән мөйөштә ятҡан тана күренә. Таңға табан мал врачын саҡыртып, саҡ быҙаулатып алдым.
Байтаҡ өйгә инергә ҡурҡып йөрөнөм. Өйҙә ҡатыным тауышы менән мине уятҡан кемдер бар кеүек тойолдо. Был хәлде ишеткән кешеләрҙең барыһы ла өй эйәһе шулай итеп беҙҙең һыйырҙы һаҡлап ҡалған тине. Бәлки, фәрештә лә булғандыр. Шуға күрә бөгөн һарайыбыҙ йәме булып үҫеп киткән был безәүкәйгә Фәрештә тип ҡушамат тағылды ла ҡуйҙы.
С. ҮРКЕНБАЕВ.
