Нисек мин НЛО күрҙем

Этем урамдағы эскәмйә эргәһенә ултырҙы, бер тауыш сығармай ҡурҡҡан кеүек, күккә ҡарай. Мин дә эскәмйәгә ултырҙым да ул төбәлгән яҡҡа ҡараһа-а-ам... Һауала киңлеге метр ярым тирәһе, бейеклеге 20-30 сантиметрҙай бер нәмә эленеп тора. Үҙе дискотекалағы яҡтыртҡыс һымаҡ төрлө төҫтәрҙә зигзаг яһап, өйрөлә. Мин арбалып шул нәмәгә ҡарап ҡаттым. Бер заман был яҡтыртҡыс беҙгә табан ыңғайланы. Ҡот осто. Этемә, әйҙә индек, тип ипләп кенә, аяҡтарҙы шылдырып ҡына баҫып өйгә табанланым. Ингәс, урыныма ятҡайным бер яҡ ҡолағымда "Морзе азбукаһы" һымаҡ "пип-пип-пип" тигән тауыш тора. Тик ул Морзе тыҡылдауы түгел, ул хәрефтәрҙе мәктәптә әҙ-мәҙ өйрәндек бит инде. Икенсе ҡабырғама ятып, был ҡолағымды ҡаплаһам, уныһынан да шул тауыштар ишетелә. Салҡатан ятып та ҡараным. Саҡ таң аттырҙым. Ғүмерҙә борсомаған башым шул мәлдә ауыртты. Пипелдәү тауышы үҙенән-үҙе юҡҡа сыҡты. Аҙаҡтан сит планета кешеләренең карабы булғандыр, тигән фекергә килдем. Этем аша мине урамға сығарып, алып китергә уйланылар микән... Кешегә һөйләгәс, береһе лә ышанманы. Аҡылдан яҙғандар рәтенә индерерҙәр, тип ул турала башҡа ауыҙ ҙа асманым. Дүрт йыл үткәс йәнә һеҙгә һөйләп ҡарарға булдым. Ышанаһығыҙмы, юҡмы, уныһы һеҙҙең эш. Әммә был хәл ысынында булды.

Сығанаҡ: Ғәләмәт донъя