Башҡортостан Инвестиция мөхите торошоноң милли рейтингында өсөнсө урынды алды

2023 йыл йомғаҡтары буйынса Башҡортостан, үҙенең күрһәткесен бер урынға яҡшыртып, Мәскәү өлкәһе һәм Төмән өлкәһе менән өсөнсө урынды бүлеште. Рейтингтың тәүге ике баҫҡысын Мәскәү һәм Татарстан биләй. Башҡортостан беренсе тапҡыр рейтингта өсөнсө урынды алды.

Ил субъекттары араһында Инвестиция мөхите торошоноң милли рейтингы 2014 йылдан Рәсәй Президенты Владимир Путиндың ҡушыуы буйынса төҙөлә. Рейтинг бизнес алып барыу өсөн уңайлы шарттар булдырыу буйынса төбәктәрҙең эшен баһалай. Рейтинг методологияһы бизнестың фекере менән ҡыҙыҡһыныуҙы һәм статистика мәғлүмәттәрен анализлауҙы күҙ уңында тота. Һөҙөмтәләр йыл да Петербург халыҡ-ара иҡтисади форумында иғлан ителә.

Башҡортостан Милли рейтингта 2015 йылдан ҡатнаша һәм дүртенсе йыл рәттән Рәсәйҙең иң яҡшы биш төбәге иҫәбендә.

2019-2023 йылдарҙа финанслауҙың бөтә сығанаҡтары иҫәбенә төп капиталға инвестициялар күләме 52,9% артҡан.

2023 йылда инвестициялар күләме 620 миллиард һум, йәғни 2022 йылға ҡарата 107,6% тәшкил иткән, шуның 364,7 миллиард һумы (58,8%) – ҙур һәм уртаса ойошмаларҙың инвестициялары. 2024 йылдың беренсе кварталында иһә 104,9 миллиард һум, 2023-төң беренсе кварталына ҡарата 124,2%.

2024 йылдың 29 майына ҡарата Башҡортостан Республикаһының Өҫтөнлөклө инвестиция проекттары исемлегенә 361 инвестиция проекты индерелгән.

2018 йылдың октябренән Башҡортостан Инвестиция комитетының «Инвестиция сәғәте» форматында 151 ултырышы үткәрелгән, унда дөйөм күләме 1 триллион һумдан ашыу тәшкил иткән 626 инвестиция проекты ҡаралған.

https://www.bashinform.ru/news/politics/2024-06-07/bashkiriya-zanyala-3-mesto-v-natsionalnom-reytinge-investitsionnogo-klimata-3802482