“Шәкүр” позывнойлы яугирҙың сабыйҙарҙыҡы кеүек саф күҙҙәренә ҡарап, махсус хәрби операция зонаһына барып ҡайтҡан, тип әйтерлек тә түгел. Егет башҡа төрлө ҡушамат эҙләп тормай: бала саҡта дуҫтар биргәнен һайлай. “Мобилизация башланғас та, яуға барырға ниәт иттем, башта медицина күҙәтеүе бик ҡәтғи булды, тәүҙән алманылар. Мөмкинлек булыу менән пехотасылар сафына яҙылдым”, - ти ул. Әсәһе Зөлфиә Фәһим ҡыҙын борсомаҫ өсөн, вахта буйынса эшкә йыйындым, тип алдай. Өйләнмәгән, ейән-ейәнсәрҙәр һөйөп өлгөрмәгән ханымдың йөрәге илай, әлбиттә. Дөрөҫлөк беҙҙең яҡта икәнлеген аңлап яуға ынтылған егетте тотоп буламы һуң! Әле ул госпиталдә бер аҙ дауаланғандан һуң атай-әсәй йортона ҡайтҡан. “Илһөйәрлек тойғоһо әсә һөтө, халҡыбыҙҙың ғөрөф-ғәҙәте менән биреләлер, тип уйлайым. Партизан ауыл биләмәһенән махсус хәрби операция зонаһына 18 ир-егет юлланған, шуларҙың 7-һе - үҙ ирке менән, 11-е - мобилизация буйынса китте”, - ти ауыл биләмәһе хакимиәте башлығы Наталья Любишева.