Бөгөнгө көндөң иң яҡшы кәңәштәре

Йышыраҡ йылмайығыҙ. Ҡаштары төйөлөп, һөмһөрөһө ҡойолоп, бөтә нәмәгә зарланып йөрөүселәр менән кемдең аралашҡыһы килеп торһон? Хәҙерге барлыҡ заманында ҡәнәғәт булмау оятһыҙлыҡҡа бәрәбәр.

 Яйы сыҡҡан һайын кешене маҡтарға кәрәк. Маҡтайым тиһәң, сәбәбе табыла. Африкала бер үҙенсәлекле ҡәбилә бар. Эш боҙоусыны, язаға тарттырыр урынына, уртаға ултыртып алып маҡтайҙар. Эҙләһәң, һәр кемдең дә яҡшы яҡтары бар инде. Ул кеше дөрөҫ юлға баҫҡанға тиклем уңайы сыҡҡан һайын маҡтайҙар икән. Ысынлап та, был сара ыңғай һөҙөмтәләргә килтерә, тиҙәр.

 Кеше һеҙҙең фекер менән килешмәҫкә лә мөмкин. Үҙегеҙҙе генә дөрөҫ тип һанарға ярамай. Фекере үҙеңдекенә тап килмәгән кешене дошман тип ҡабул итеү — аҡылһыҙлыҡ.