Ураҙаға әҙерләнәбеҙ

Изге Рамаҙан айы уртаса 30 көн дауам итә. Дин ҡушыуы буйынса, был ваҡытта мосолмандарға ҡояш байығансы эсергә лә, ашарға ла тыйыла. Ураҙаны ашамай тор­ғанда киҫкенләшергә мөмкин булған һау­лыҡ менән проблемалар булғанда тотмаҫҡа мөмкин.
Фәнни тикшеренеүҙәр бу­­­йынса, ураҙа сәләмәт кеше өсөн хәүеф­ле түгел. Ләкин киҫкен һәм хроник сирле­­гә, шулай уҡ ҡайһы бер дарыу препаратын даими нигеҙҙә ҡабул итеүсегә тот­мау яҡшыраҡ. Шулай уҡ Рамаҙан айын­да шәкәр диабеты һәм аш-һыу торошо бо­ҙолған (нервы анорексия­һы йәки булимия) кешегә ураҙа тотоуҙан тыйылырға кәрәк.
Рамаҙан айында ураҙаға әҙерләнеү өсөн медицина анализдары тапшырыу урынлы булыр
Һаулыҡҡа зыян килтермәһен өсөн, уға дөрөҫ әҙерләнергә һәм табип менән кәңәшләшергә кәрәк. Был бигерәк тә ашҡаҙан-эсәк юлы һәм башҡа ауырыуҙан яфаланған кеше өсөн мөһим.
Әгәр бер ни ҙә борсомаһа, ҡан һәм бәүел анализы сәләмәтлектең дөйөм торошон баһаларға ярҙам итәсәк. Уны Рамаҙанға тиклем 2-3 аҙна алдан тапшырыр­ға кәрәк. Уның һөҙөмтәһе буйынса табип киләсәктә һаулыҡҡа бәйле проблемаға килтерә алған етешһеҙлекте асыҡларға мөмкин.
Туҡланыуҙы ҡәтғи сикләү тураһында ҡарар ҡабул итер алдынан ҡанда С-реактив аҡһым кимәлен тикшерергә кәрәк. С-реактив аҡһым - шешеү процесының иртә һәм иң һиҙгер индикаторы. Тикшеренеү шешеү кимәлен билдәләргә, өҙлөгөү хәүефен баһаларға, дауалауҙы контролдә тоторға ярҙам итә.
Өҫтәмә рәүештә табип фруктозаминға, дөйөм холестеринға һәм бәүел кислотаһына анализдар тәғәйенләргә мөмкин. Был ҡан күрһәткестәренең үҙгәреүен рациондың ҡапыл үҙгәргән йәки ғәҙәти туҡланыу режим ваҡытында күҙәтергә кәңәш итәләр.
Анализ һөҙөмтәләре буйынса табип кешенең сәләмәтлек торошон баһалай һәм ураҙа тотҡанда тейешле һаҡлыҡ сараларын йәки һаулығын һаҡлау алымдарын тәҡдим итә ала.
Рамаҙан айы рухи үҫеш кенә түгел, ә физик яҡтан сәләмәтләнеү осоро ла булһын. Аслыҡ организмды таҙартыуға, аш һеңдереүҙе яҡшыртыуға һәм энергия кимәлен күтәреүгә булышлыҡ итә. Был ай рух һәм тән гармонияһына ирешеү өсөн кәрәкле көс бүләк итһен өсөн, һеҙгә ысын күңелдән һаулыҡ, рух күтәренкелеге һәм ныҡлыҡ теләйбеҙ.