+30 °С
Болотло
Әҙәбиәт
20 Июнь , 06:03
КҮҢЕЛ БӨТӨНЛӨГӨ. Айзилә Мортаева
Матур шиғыр. Уҡыйыҡ әле.
КҮҢЕЛ БӨТӨНЛӨГӨ. Айзилә Мортаева
Күлдәй генә түңәрәк,
Ерҙәй генә түңәрәк.
Түңәрәк кенә бөтөнлөк,
Һин миңә шундай кәрәк!
Түңәрәк кенә бөтөнлөк
Һине табайым ҡайҙан?
Ҡояшыма ҡулды һонам,
Һорайым микән Айҙан?
Түңәрәк кенә бөтөнлөк
Түңәрәк күлдәме һин?
Бөтөнлөгөң үҙеңдә тип,
Иң һалған билдәме һин?
Көмөш кенә батмустағы
Һин һары ғына маймы?
Яҙҙарыма алдаштырған
Һин зөмрәт кенә маймы?
Түңәрәк кенә өҫтәлме
Самауыр – сынаяҡлы?
Һинһеҙ, күңел бөтөнлөгө,
Минең йәнем ҡанатһыҙ!
Түңәрәк кенә бөтөнлөк,
Күңел сөңгөлөн бөтәйт!
Үҙ-үҙеңә Ҡояшһың тип,
Инандыр, йәнемә әйт!
(Айзилә Мортаева)
