Башҡортостанда коронавирустан үлгән табип менән хушлаштылар

Зыяратта ябыҡ табут һәм махсус костюм кейгән биш кеше. Егорьевск үҙәк район дауаханаһы терапевы Наил Саматовты һуңғы юлға шулай оҙаттылар. Ул Мәскәү өлкәһендә коронавирустан вафат булһа ла, ерләргә уны тыуған яғына – Салауат районы Ахун ауылына алып ҡайттылар. Наилдың ҡәбере атаһыныҡы янында урынлашҡан, тип хәбәр итте «Салауат ерендә» гәзите.

Бынан алда «Башинформ» 2020 йылдың 6 майында Мәскәү өлкәһе поликлиникаһы терапевының яңы коронавирус инфекцияһынан вафат булыуы хаҡында яҙғайны. Наил Саматовҡа 28 йәш ине.

Ул Янғантау урта мәктәбен, ә былтыр «Дауалау эше» белгеслеге буйынса Башҡорт дәүләт медицина университетын тамамлаған. 2020 йылдың 30 ғинуарында Егорьевск үҙәк район дауаханаһының 3-сө поликлиникаһына эшкә урынлашҡан. Наил был сирҙе пациенттың өйөндә йоҡторған. Башҡортостан табибының исеме «Хәтер исемлеге»нә индерелгән.