Күҙ теймәһен үҙеңә

Сылтыр-сылтыр итә тәңкәләре, Көмөш беләҙектәр беләктә, Ынйы түшелдерек, йәшел камзул, Бик килешле сатин күлдәктә: Уның ең остары, итәктәре Ҡат-ҡат ейәк баҫҡан, бөрмәле, Ҡыҙыл, һары, йәки йәшкелт төҫтә, Ә иҙеүе арттан элмәле. Көйәнтәле сулпы ҡушып үргән Толомдары төшкән биленә, Ҡыҙҙың уңғанлығы, саялығы Атта елеп китһә беленә. Башҡорт ҡыҙы! Инде бейей төшһә, Ҡашуҡаһы балҡый ҡояштай, Тал-сыбыҡтай биле, һомғол кәүҙә- Күл өҫтөндә йөҙгән аҡҡоштай. Был кейемдә ниндәй матурһың һин, Һоҡланмаған кеше юҡ һиңә, Талир тәңкәләрең таҡ күберәк, Бер үк күҙ теймәһен үҙеңә!Хәлиҙә ШӘЙӘХМӘТОВА.