Инһәң әгәр урмандарға

Урман - Ер йөҙөндәге иң ҙур хазина. Һулаған һауабыҙ сығанағы ла, йылытыусыбыҙ ҙа, туҡландырыусыбыҙ ҙа, күңелгә ял һәм сихәт биреүсе лә ул. Ҡайһы саҡ уның ҡәҙерен онотоп китәбеҙ. Рөхсәтһеҙ ағас йығабыҙ, емеш йыябыҙ тип, ҡыуаҡтарҙы һындырабыҙ, ял иткәндә сүп-сар ҡалдырабыҙ, усаҡ яғабыҙ ҙа һүндермәй китәбеҙ.

Урмансылар тәбиғәтебеҙҙең ышаныслы һаҡсылары. Уларҙың эшмәкәрлеге ике төп йүнәлеште күҙаллай. Беренсеһе - урмандарҙы һаҡлау һәм хужаларса файҙаланыу, икенсеһе - уларҙың сифатын яҡшыртыу, яңыртыу.

Беҙҙең район урмансылары ла ошо йүнәлештә яҡшы эш алып бара. “Башҡортостан милли паркы Ағиҙел һәм Ырғыҙлы участкалары урманлыҡтарынан тора. Урман хужалығы эшмәкәрлеген милли парктың урман хужалығы бүлеге хеҙмәтләндерә. Бүлектә тәжрибәле һәм юғары квалификациялы туғыҙ хеҙмәткәр эшләй. Ағиҙел участкаһы урмансылығына милли парктың Мәләүез һәм Күгәрсен муниципаль берәмектәренә ҡараған 49260 гектар урман фонды инә, Ырғыҙлы участкаһы урмансылығын Бөрйән муниципаль берәмеккә ҡараған 30540 гектар милли парк урман фонды тәшкил итә. Хужалыҡ бүлегенең төп эшмәкәрлеге урманды янғындан, тәбиғи комплекстарҙың тотороҡлоғон һаҡлауға һәм арттырыуға йүнәлтелгән. Атап әйткәндә, минераллашҡан һыҙаттар һөрөү, урман юлдарын тәртиптә тотоп, ял итеүселәр өсөн хәүеф янаған ағастарҙы һайланма санитар киҫеү, таҙартыу һәм тәрбиәләү эштәре, биотехник саралар үткәреү”, - ти урман хужалығы бүлеге начальнигы Рәғиз Муллағолов.