Илдең көнө ер менән

Районда ауыл хужалыҡтары көҙгө эштәрҙе йомғаҡлауға табан бара. Ғүмәр Иҫәнов етәкләгән крәҫтиән-фермер хужалығы - бөгөн киң ҡолас менән үҫешкән хужалыҡтарҙың береһе. Халҡын яратҡан, рухлы яҡташыбыҙ милләте өсөн дә янып йәшәй. Райондың берҙән-бер башҡорт гәзите “Көнгәк”те лә ярҙамынан ташламай.

Бында быйылғы ураҡ тамамланыу алдында. Иң һуңынан ҡарабойҙай йыйып алынды. Шулай уҡ ерҙе туңға һөрөү башҡарыла. Агроном Илнур Иҫәнов билдәләүенсә, яңы уңыш һөйөндөрә. Ауыл халҡына пай ерендә сәскән игенде таратҡандар ҙа инде. Эшсәндәр яңы бойҙайҙан, үҙ тирмәндәрендә үткәрелгән, экология яҡтан таҙа он менән дә тәьмин ителә.

“Ғаилә малсылыҡ фермаһы” гранды отоп үҙгәртеп ҡоролған аҙбарҙары ҡышҡы миҙгелгә әҙер: тәртипкә килтерелгән, капиталь ремонтҡа мохтаж һарайҙар юҡ. Хужалыҡтың булдыҡлы етәксеһе Ғүмәр Иҫәнов халыҡҡа эш, хеҙмәт хаҡы булһын тип ал-ял белмәй тырыша: “Фермер эше ситтән ҡарағанда ғына еңел кеүек, уны тотороҡло эшләтеү өсөн бик күп көс һалырға кәрәк. Көҙгө баҫыу эштәре тамамланһа ла, ҡуйылған маҡсаттар байтаҡ, киләһе йылды ла уйлап, быйылға йомғаҡ яһау мәсьәләһе алда”, - ти ул. Фермерлыҡ менән шөғөлләнеүселәр - райондың тотҡаһы тиһәм, яңылыш булмаҫ. Тарҡалып, бушап ҡалған ауыл фермаҙарын төҙөкләндереп, яңыларын төҙөп, мал аҫраған фермерлар ябай эшмәкәрҙәр генә түгел, улар ауыл тормошона яңы һулыш, эш биреүсе лә.