Ноябрь уңыштарға бай

Көҙҙөң һуңғы айы мәҙәни-ял үҙәге ижади коллективтары өсөн айырыуса һөҙөмтәле булды. Еңеүҙәр тупланмаһы ярайһы ныҡ ҡына тулыланды.

Рәсәйҙең төрлө төбәктәренән 1500 үҙешмәкәр артисты йыйған “Ҡырым тирмәһе” асыҡ балалар фольклор коллективтары фестиваль-конкурсында Арыҫлан ауыл мҙәнәиәт йортонан Азамат Суҡбаев “Халыҡ бейеү традицияһы. Солистар” номинацияһында I дәрәжә диплом менән бүләкләнде.

“Шихан” этноауылын үҫтереүгә ҙур өлөш индергәне өсөн “Славянский хоровод” урыҫ фольклор коллективы һәм уның етәксеһе Ольга Танатарова Рәхмәт хаты менән билдәләнде. Улар октябрҙә Торатау янында этнофестивалдә ҡатнашты. Эшҡыуарҙар туристик индустрияһы һәм сәләмәт йәшәү рәүеше ассоцияцияһы президенты Алексей Абалымов Воскресенский ауылы мәҙәниәтен һәм тарихын пропагандалағаны өсөн Наталья Смирноваға айырым рәхмәт белдерҙе. Был тораҡ пункт былтыр тарихи биләмә статусына эйә булды һәм геопарктың бер өлөшөн тәшкил итте.

Был наградаларҙың барыһы ла Мәләүез районында халыҡ ижадын һаҡлауға, үҫтереүгә ҙур иғтибар бирелеүен дәлилләне.

Гөлгөнә САҠАЕВА, мәҙәни-ял үҙәге методисы.