Ғәмәлдәр тормошҡа ашһын

Урындағы башланғыстарҙы хуплау программаһы биләмәләрҙе төҙөкләндереүгә йүнәлтелгән проекттарҙы тормошҡа ашырыуға конкурс нигеҙендә республика бюджетынан аҡсалата ярҙам бүлеүҙе күҙаллай. Иң мөһиме, унда халыҡ әүҙем ҡатнашырға һәм ул һайлаған проект биләмәлә өҫтөнлөклө проблеманы хәл итергә йүнәлтелгән булырға тейеш. Ергән ауыл биләмәһенең Йомаҡ ауылы халҡы программала быйыл да ҡатнаша. Ошо уңайҙан ауылдаштар йыйылышы уҙҙы. Сығарылған проекттарҙың иң мөһиме - ауыл биләмәһенә трактор һатып алыу. Был - күптән күтәрелгән мәсьәлә, бөгөн конкурста һайлап алыу этабынан һуң, бурысты үтәү мөмкинлеге тыуа. Трактор хаҡы - 2 миллион һум тирәһе. Ғариза һәм документтар тапшырғас, кәрәкле балды йыйып, финанс ярҙамы алғас, проект тормошҡа ашырыласаҡ.