+17 °С
Облачно
Яңылыҡтар
1 Июня 2021, 12:44
Ярты быуат буйы бергә
Татыу ғаиләнең сере - бер-береңде аңлап, яратып, хөрмәтләп, ғәфү итеп йәшәүҙә
Ошо көндәрҙә Елизавета һәм Евгений Блохиндар бергә йәшәүҙәренең алтын юбилейын билдәләне. Һөйкөмлө, матур парҙы ЗАГС бүлеге начальнигы Лилиә Менчикова ихлас ҡотлап, республика башлығы Радий Хәбировтың тәбрикләү сәләмен еткерҙе һәм бүләк тапшырҙы.
- Икебеҙ ҙә автоколоннала эшләнек. Мин токарь инем, ә Елизавета комсомол ойошмаһы секретары булды. Мине ныҡышып (авт. йылмая) ойошмаға индерҙе. Шул саҡтан дуҫлашып киттек, аҙаҡ өйләнештек, - ти Евгений Яковлевич, хәтирәләргә бирелеп.
Ғаилә башлығына - 72, ханымға 69 йәш. Икеһе лә дәртле, гөрләтеп донъя көтәләр. Шәхси йортта йәшәгәс баҡсаһын да үҫтерәләр, үҙ хужалығын алып баралар. Елизавета Федоровна гөл-сәскә үҫтерергә ярата, Евгений Яковлевич пластик материалдан, шинанан төрлө һындар яһарға әүәҫ.
- Өс балабыҙ бар ине. Ҡыҙыбыҙ Наталья ғына ҡалды. Ул кейәүебеҙ Евгений Денисов һәм ейән-ейәнсәрҙәребеҙ Роман, Полина, Вероника менән инде өс йыл Испанияла йәшәй. Өйрәнделәр хәҙер, кескәйҙәре сит телде һыу кеүек эсә. Көн дә телефон аша һөйләшеп торабыҙ. Тиҙҙән ҡайтып һөйөндөрөрҙәр инде, - ти әсә кеше.
Блохиндар үҙҙәре лә сәйәхәт ҡылырға ярата. Испания, Төркиә, Египет, Ғәрәп Әмирлектәрендә ял иткәндәр.
Артабан да тигеҙ ғүмер насип итһен.