+28 °С
Болотло
Яңылыҡтар
19 Июль 2022, 11:41
Дуҫлыҡ - ҡеүәтле көс
Ҡаланан ситтә урынлашҡан балалар лагерҙарында икенсе смена тамамланыуға бара. Көнгәк тауы битләүендәге “Дуҫлыҡ” һауыҡтырыу лагерында ял иткән Луганск Халыҡ Республикаһынан балаларға ла Башҡортостан менән хушлашырға ваҡыт етте. Уларҙың ялы сағыу тәьҫораттарға бай булһын, рәхәтләнеп ял итһен, сәләмәтлеген нығытһын өсөн лагерь коллективы бар мөмкинлектәрҙе ҡулланды, уңайлы шарттар тыуҙырҙы. Экскурсиялар, осрашыуҙар, спартакиадалар, тематик кисәләр ойошторҙолар. Шишәмбелә балалар Башҡортостан Республикаһы Дәүләт Йыйылышы – Ҡоролтай депутаты Тимур Ғилмийәров, уның ярҙамсыһы Ильвира Кадынцева һәм эшҡыуар Татьяна Салтыкова менән осрашты. Уларҙы мәғариф идаралығы начальнигы Алик Сатлыҡов оҙатып йөрөнө.
Дуҫлыҡ - ҡеүәтле көс
Тимур Рим улы йәш быуын алдында сығыш яһар алдынан, иң беренсе, уларҙың кәйефе, тәьҫораттары хаҡында һорашты. Яуаптар, һис шикһеҙ, ыңғай ине. Уларға айырыуса бассейнда һыу инеү, спорт саралары, төрлө конкурстар оҡшаған. Республиканың төрлө төбәгенән килгән тиҫтерҙәре менән дуҫлашҡандар, адрестарын, телефон һандарын алмашҡандар.
-Артабан да ошо дуҫлыҡ күперен өҙмәгеҙ. Бер-берегеҙ менән һәр ваҡыт бәйләнештә булығыҙ, кәрәк ваҡытта ярҙам итегеҙ. Татыулыҡ, берҙәмлек - ул иҫ киткес көс, - тине Тимур Ғилмийәров.
Балаларҙың да һорауҙары күп булды. Уларҙың күбеһе депутат эшмәкәрлегенә ҡағылышлы ине. Тимур Рим улы бөтәһенә лә ихлас яуап бирҙе. Татьяна Павловнаның бала саҡ хәтирәләрен дә ял итеүселәр ҙур ҡыҙыҡһыныу менән тыңланы. Осрашыу аҙағында ҡунаҡтар ЛНР-ҙан килгән балаларға Башҡортостан тураһында иҫтәлекле логотип менән футболкалар бүләк итте.
Луганск Халыҡ Республикаһының Ровеньки ҡалаһынан Кристина Вандышева ял итеүселәр исеменән республика етәкселегенә, лагерь коллективына рәхмәт белдерҙе.
Лена АБДРАХМАНОВА.
Дуҫлыҡ - ҡеүәтле көс
