Битарафлыҡ

Башҡорт халҡын бөтөрөүселәр маңҡорттар ул, тигән булалар. Ҡаршы түгелмен. Шулайҙыр.
Башҡорт халҡын бөтөрөүселәр битарафтар ул, тиҙәр. Ә бына быныһына ҡуш ҡуллап ризамын. Ысынлап та, бар донъябыҙҙы битарафтар баҫып алған. Бына кемдәр ул халҡыбыҙҙың иң яуыз дошмандары. Уларҙы ситтән эҙләргә түгел. Битараф әҙәмдәр менән тирә-яғыбыҙ тулған. Ике аяҡлы ҡамғаҡтар һымаҡ улар.
Битарафтар эскеселәр менән маңҡорттарға ҡарағанда милләтебеҙ өсөн йөҙләтә тапҡыр ҡурҡынысыраҡ. Уларҙың бара-тора халҡыбыҙ яҙмышына һуңғы нөктә ҡуйыуҙары ла ихтимал. Аллам һаҡлаһын!
Эскеселәр эсеп үлеп бөтә, маңҡорттарҙың нәҫеле ҡорой. Ә бына битарафтар бөтмәй, улар аҙым һайын. Улар үрсей. Ә шулай ҙа битарафтарҙан ҡурҡмағыҙ, битараф булыуҙан ҡурҡығыҙ. Шулайтып ҡына халҡыбыҙҙы ҡотҡарып алып ҡала алырбыҙ.

Тәлғәт ШАҺМАНОВ.