Бөгөн, 25 декабрҙә Ергән ауылы халҡы махсус хәрби операцияла батырҙарса һәләк булған Александр Галансков (21.04.1994 - 13.11.2024 й.й.) менән бәхилләште.
Мәрхүмде һуңғы юлға оҙатыуҙа уның яҡын кешеләре, ауылдаштары, район хакимиәте башлығы урынбаҫары Ринат Бикбулатов, Мәләүез ҡалаһының, Мәләүез һәм Федоровка райондарының хәрби комиссары урынбаҫары Семен Кочергин, Ергән ауыл биләмәһе башлығы Рәил Әбделғәниев, йәмәғәт ойошмалары вәкилдәре һәм башҡалар ҡатнашты.
Александр Викторович 1994 йылдың 21 апрелендә райондың Климовка ауылында тыуған. 9 класҡа тиклем Ергән урта мәктәбендә уҡый. Мәктәпте тамамлағандан һуң, Ишембай нефть колледжына уҡырға инә һәм уны 2017 йылда «Быраусы»һөнәре буйынса тамамлай. 2014-2015 йылдарҙа РФ Ҡораллы Көстәре сафында хеҙмәт итә.«АкрилСалават» яуаплылығы сикләнгән йәмғиәтендә аппаратсы булып эшләй.
2022 йылдың 17 октябрендә мобилизация буйынса хәрби хеҙмәткә саҡырыла. Хәрби әҙерлектән һуң махсус хәрби операцияға китә. 2024 йылдың 13 ноябрендә Луганск һәм Донецк Халыҡ Республикалары биләмәһендә хәрби бурыстарын үтәгәндә батырҙарса һәләк була.
Беҙ яугирҙең барлыҡ яҡын кешеләренең ауыр ҡайғыһын уртаҡлашып, уларға сабырлыҡ теләйбеҙ.
Автор фотолары.
