Дини рух

Белеүебеҙсә, кешене кеше иткән дүрт үҙенсә­лек бар:

1. аң һәм фекер;
2. рух;
3. ҡыйыулыҡ, азатлыҡ һөйөү;
4. һөйләшә белеү.

Бала тәрбиәһенең нигеҙен кешеләге ошо дүрт мөһим үҙенсәлекте камиллаштырыу тәш­кил итә лә инде.
Педагогика - йәғни бала тәрбиәһе ислам динендә иң мөһим бер ғилем. Был маҡсаттарға ирешеү өсөн бала кескәй йәштән үк төрлө һөнәргә өйрәнергә һәм сәнғәт оҫтаһы булырға тырышырға тейеш.
Рәсүл Әкрәм, ғәләйһис-сәләм, был йәһәттән: «Алла сәнғәт оҫтаһы булған мөьминдәрҙе һөйөр», тигән. Ислам ғалимдарының бөйөктәренән булған Имам Ғазали хәҙрәттәре бала тәрбиәһе хаҡындағы әҫәрендә шуларҙы яҙған: «Бала - ата-әсә ҡулындағы бер аманаттыр, бөйөк бер ниғмәттер. Шул ниғмәттең ҡиммәте беленмәһә, ул ҡулдан китер. Бала - ул шәм кеүек төрлө сүрәттәргә инер. Бала - ул таҙа бер тупраҡ кеүек. Шул таҙа тупраҡҡа ниндәй орлоҡ сәселһә, уның емеше лә шулай хасил булыр. Сабыйҙарыбыҙға иман, Ҡөрьән Кәрим һәм Аллаһу Тәғәләнең әмерҙәрен өйрәтеп, Әхирәт һәм донъя сәғәҙәтенә осрашырға ярҙамсы булырға тейешлебеҙ».
Был һөйөү-сәғәҙәттең, был бәхеттең са­уабы ата-әсәләре менән уртаҡ булыр. Ата-­әсәләр өсөн балаларын тәрбиәләү йә­һән­нәм утынан һаҡланыу, ғазаптарынан һаҡ­ланыуҙан тағы ла мөһимдер. Бөтә дин­һеҙ­лек һәм яйһыҙлыҡтарҙың башы балаларыбыҙ сабый сағында дини тәрбиә күрмәгәнлектәндер һәм насар дуҫтар-иптәштәр мө­хитендә ҡалыуҙандыр.
Пәйғәмбәребеҙ, ғәләйһис-сәләм: «Бөтә балалар мосолманлыҡ рухы менән донъя­ға килә. Ләкин һуңынан ғаиләлә ата-әсә­ләре христиан, йәһүд йә иһә динһеҙ итер», - ти. Ислам динебеҙҙең әхлаҡи ҡөҙ­рәттәре, инсани һәм социаль ҡараштан, бала тәрбиәһе булған бер хазиналыр. Әгәр бала был инаныстар нигеҙендә тәрбиәләнһә, выж­дан­лы, яҡшы холоҡло, йәмғиәткә яраҡ­лы бер кеше булыр.

Пәйғәмбәребеҙ бойорҙо:

Атаның балаларына ҡалырлыҡ иң бөйөк мираҫы - гүзәл тәрбиә.
Балаларығыҙ менән инсафлы мөнәсәбәттә булығыҙ һәм уларҙы яҡшы тәрбиәләгеҙ.
Һаҡ булығыҙ: ҡыҙ балаларығыҙҙы хур­лау­ҙан һаҡлағыҙ.
Бала - Йәннәт ниғмәттәренең береһелер.
Йәннәттә рәхәт тын алырлыҡ һәм һөйө­нөс менән тулы шундай бер ер барҙыр, ун­да тик балаларын һөйөндөргәндәр генә алыр.
Балаларығыҙ һеҙгә Алланың иң гүзәл бү­ләгелер. Тимәк, уларҙы хәрәм ризыҡ менән туҡландырмағыҙ.
Алланан ҡурҡығыҙ һәм балаларығыҙ ха­ҡына шәфҡәт менән ғәҙеллектән айырылмағыҙ.

Дини календарҙан.