+32 °С
Ясно
Яңылыҡтар
8 Июля , 09:09
Ауыл халҡына мөһим ярҙам
6 июлдән Мәләүез районында «Һаулыҡ поезы» эшләй башланы. Тәүге ике көндә ул Тамъян, Ташлыкүл, Ҡаран, Кузьминовка ауылдары халҡының сәләмәтлеген тикшерҙе. Мөһим сара “Оҙайлы һәм әүҙем тормош” милли проекты һәм республиканың «Сәләмәт республика - сәләмәт төбәк» акцияһы сиктәрендә үтә. Күсмә медицина комплексы бригадаһында терапевт, хирург, невролог, эндокринолог, педиатр, офтальмолог, хирург, уролог, кардиолог, стоматолог, гинеколог һәм башҡа белгестәр эшләй. Флюорография, маммография кеүек диагностик процедуралар үтергә мөмкин. Район хакимиәте башлығының социаль мәсьәләләр буйынса урынбаҫары Олеся Рыпинская һәм үҙәк район дауаханаһы баш врачы Илмир Ҡотлоғужин бригадаға уңышлы старт теләне.
Ауыл халҡына мөһим ярҙам
Ауыл халҡы өсөн был бик мөһим: ҡалаға барыу ваҡыт, аҡса һәм көс талап итә, ә бында барлығы бер урында, тиҙерәк һәм бушлай. Тамъян ФАП-ы фельдшеры Венера Ҡорманова билдәләүенсә, ауылдарҙа йәшәүселәрҙе ваҡытында тикшереү, гипертония, диабет, онкология кеүек сирҙәрҙе иҫкәртеү, тар белгестәрҙән консультация алыу мөмкинлеген биргән “Һаулыҡ поезы” ике көн дауамында өлкән йәштәгеләрҙең һәм балаларҙың һаулығын тикшергән.
Иҫегеҙгә төшөрәбеҙ, махсус техника һәм юғары технологиялы медицина ҡорамалдары менән күсмә бригада беҙҙең районда16 июлгә тиклем эшләй. 8 июлдә Ҡыҙрай, 9 һәм 10 июлдә Александровка ауылында йәшәүселәрҙе ҡабул итте. 13 июлдә - Восточныйҙа, 14 июлдә - Иштуғанда, 15 июлдә - Һарышта һәм 16 июлдә Хәсән ауылында эшен тамамлай.
Лена АБДРАХМАНОВА.
