Колледжда - яңы йүнәлеш

 Ҡаланың күп йүнәлешле һөнәри белем биреү колледжында медицина хеҙмәткәрҙәре әҙерләнә башлай.

Район хакимиәте башлығы Зәбир Ғабдуллин тарафынан ҡабул ителгән ҡарар 1 сентябрҙән тормошҡа ашырыла башлаясаҡ.

- Үҙәк район дауаханаһына медицина хеҙмәткәрҙәре етешмәү сәбәпле, белгестәрҙе беҙҙә уҡытыуҙы хәл итеү мәсьәләһе менән район хакимиәте башлығы Зәбир Ғабдуллин һәм район дауаханаһы баш врачы Илмир Ҡотлоғужин мөрәжәғәт иткәйне.

Беҙ үҙ мөмкинлектәребеҙҙе барлап, етәкселәр ҡарарын ғәмәлгә ашырыу өсөн 34.02.01 «Медсестра эше» йүнәлеше буйынса лицензия юлланыҡ. Кәрәкле медицина ҡорамалдары, дәреслектәр туплап, киләсәктә студенттарға белем бирәсәк ун дүрт кешене уҡыттыҡ. Улар барыһы ла урындағы дауахана белгестәре. Колледжда ике уҡыу кабинеты йыһазландырылды. Беҙҙә теоритик һәм практик белем алыу өсөн шарттар бар тип әйтә алабыҙ.

Ҡабул итеүҙең контроль һандары сиктәрендә республика Мәғариф министрлығы өҫтәмә рәүештә 25 бюджет урыны бүлде. Уҡыуын тамамлаусылар «Медсестра», «Медбрат» квалификацияһы ала. Студенттар үҙәк район дауаханаһында практик әҙерлек үтәсәк. Беренсе курстан уҡ һөнәри дисциплиналар үҙләштерелеүе кәрәкле компетенцияларҙы системалы формалаштырырға мөмкинлек бирә, - ти күп йүнәлешле һөнәри белем биреү колледжының уҡыу-уҡытыу эше буйынса директор урынбаҫары Людмила Дегтярева.

Фотолар архивтан.

Башҡортостан Республикаһы Башлығы Радий ХӘБИРОВ:

- Республика медицина учреждениелары өсөн йәш белгестәр һаны артыуы мөһим. Йәштәр һөнәри белемде үҙебеҙҙә алһын өсөн кәрәкле медицина һөнәрҙәрен өйрәнеү мөмкинлеген арттырҙыҡ.

Ғәлиә КӘРИМОВА, "Һуғыш балалары" район йәмәғәт ойошмаһы рәйесе:

- Медицина хеҙмәткәрҙәренең Мәләүездә әҙерләнеүе бик ҡыуаныслы хәл. Балаларын ситкә ебәрергә теләмәгән ата-әсәләр өсөн дә бик һәйбәт яңылыҡ, тип уйлайым. Район үҙәк дауаханаһы, ФАП-тар йәш белгестәр менән тулыланыуын теләйем. Улар хеҙмәт биографияһын да, тормош юлын да Мәләүез ере менән бәйләһә, бик хуп булыр ине.