2019-2024 йылдарҙа Башҡортостандың тораҡ пункттарында йәмәғәт киңлектәрен төҙөкләндереү буйынса ҙур эш башҡарылды. Күп проекттар федераль сығымдарҙы йәлеп итеү иҫәбенә тормошҡа ашырыла. Был - республиканың идара итеү командаһының көндәлек хеҙмәт һөҙөмтәһе. Бөтә проекттар ҙа халыҡтың ярҙамы һәм йәмәғәт мөхитен булдырыуҙа әүҙем ҡатнашыуы менән ғәмәлгә инә. Күбеһе тарихи урындарҙы һәм архитектураны, иҫтәлекле урындарҙы һаҡлауға, уңайлы йәмәғәт мөхитен булдырыуға йүнәлтелгән. Уларға экологияны, энергия һөҙөмтәлелеген һәм ҡала мөхитенә тотороҡлолоҡто яҡшыртыуға йүнәлтелгән инновацион ҡарарҙар ҡулланыла. Шуны билдәләп үтергә кәрәк, яңы барлыҡҡы килгән һәм төҙөкләндерелгән парктарҙың проекттары бер-береһен ҡабатламай, шул уҡ ваҡытта республикала йәшәгән төрлө халыҡтарҙың һәм конфессияларҙың традицияларын һәм менталитетын иҫәпкә ала.
Мәҫәлән, «Уңайлы ҡала мөхитен булдырыу» федераль проектын тормошҡа ашырыу сиктәрендә 2019 йылдан алып республикала 683 йәмәғәт киңлеге төҙөкләндерелгән, шул иҫәптән 2023 йылда дөйөм суммаһы 1320,3 миллион һумлыҡ 123 йәмәғәт биләмәһе, шуларҙың 25,09 миллион һум - республика ҡаҙнаһынан.
Бөгөн Мәләүездә «Дан» мәҙәни-ял паркында төҙөкләндереү эштәре гөрләй. Уны 2024 йылдың 15 мартынан 30 апреленә тиклем район халҡы тауыш биреүҙә әүҙем ҡатнашып, киләсәктә төҙөкләндереләсәк объекттар исемлегенә индереү өсөн тырышҡайны. Ул күпселек тауыш йыйып, яңыртыласаҡ биш объект исемлеген тулыландырҙы.
Мәләүездәрҙең генә түгел, килгән ҡунаҡтарҙың да яратҡан урынына әйләнгән парктың киләсәктә ниндәй буласағын күптәр түҙемһеҙләнеп көтә. Бөгөн унда иҫке асфальт ҡатламы алып ташланып, урынына яңыһы түшәлә, бордюрҙар алмаштырыла, ял итеү майҙансыҡтары барлыҡҡа килә. Оҙаҡламай төҙөлөш эштәре тамамланып, "Дан" дағы техника тауышын шат балалар тауышы алмаштырыр.
Автор фотолары.