ГҮЗӘЛ ЗАТҠА

Күпме шағир һиндә илһам тапҡан,
Йыһан тапҡан аҡыл эйәһе.
Ваҡыт биргән баһа - ысын баһа,
Хөрмәт менән башың эйәһең.

Сал быуаттар аша тойоп була
Һин ҡабыҙған усаҡ йылыһын.
Бөгөн беҙҙең һалҡын доньябыҙҙы
Туңдырмайса тотҡан йылы һин.

Иң гүзәл зат тинек, ә ҡулыңа
Сәскә түгел, көрәк тотторҙоҡ.
Балаһынан әсә айырылды,
Киләсәкте аңһыҙ отторҙоҡ.

Баҙар тәмле ҡалас ашатыр, тип
Ғәҙел, бөйөк илде тарҡаттыҡ.
Ярыҡ ялғаш икән баҙарыбыҙ,
Ас – яланғас ҡалдыҡ, шаҡ ҡаттыҡ.

Ирең донья ҡыуып Себер китә,
Ҡорал тотҡан улың – ил һағы.
Тоғро ҡатын һаҡлай өйҙөң ҡотон,
Йылы һаҡлай ҡайнар усағы...

Йәшәүгә йәм биргән гүзәл затҡа
Тик бер көнлөк ҡәҙер – өлөшмө?
Шартлар сиккә еткән ҡырыҫ заман
Өлөшөнә төшкән көмөшмө?

Тип зарланғы килмәй. Һинең алға
Йөрәгемде асып һалам мин.
Наҙлы, мөхәббәтле гүзәл затҡа
Мәңгелеккә тоғро ҡалам мин.

Тимер НИӘТШИН.

Л. Хәйруллина фотоһы.