Тиҙҙән имтихандар осоро етә

Бөгөн 4-се мәктәптә район һәм ҡала мәктәптәренең 9-сы класс уҡыусылары өсөн математика буйынса төп дәүләт имтиханына әҙерлек буйынса республика күләмендәге күнекмә сара үтте. Унда бөтәһе 266 туғыҙынсы класс уҡыусыһы ҡатнашты.

Күнекмәнең маҡсаты – техник һәм ойоштороу регламенттарын тикшереү, ойоштороусыларҙы һәм сығарылыш уҡыусыларын ысын имтиханға әҙерләү. Мәктәп уҡыусылары имтихандың үткәреү пунктынан алып һөҙөмтәне алыуға тиклем бөтә этаптарын уңышлы үтте. Был белемде тикшереү генә түгел, ә форматҡа психологик яҡтан яраҡлашыу, ваҡытты бүлергә өйрәнеү һәм үҙеңдә ышаныс тойғоһо тәрбиәләү.

Иҫегеҙгә төшөрәбеҙ, Рәсәй Мәғариф министрлығы һәм Рособрнадзорҙың уртаҡ бойороҡтары менән 2026 йылда төп дәүләт имтиханы үткәреү ваҡыты раҫланған. 9-сы класс сығарылыш уҡыусылары өсөн имтихандарҙы үткәреү өс осорға бүленгән: ваҡытынан алда 21 апрелдән 18 майға тиклем, төп осор - 2 июндән 6 июлгә һәм өҫтәмә  осор -3 сентябрҙән 25 сентябргә тиклем.