+30 °С
Болотло
Файҙалы кәңәштәр
7 Июль 2025, 16:42
Рәхмәт әйтәйек
Ниндәй генә һүҙ юҡ был донъяла! Бер үк һүҙҙең донъя телдәрендә төрлөсә яңғырағаны тураһында уйланһаң иҫ киткес байлыҡ бит ул. Беҙҙең рәхмәт әйтә торған кешеләр, ваҡиғалар, күренештәр, мәлдәр бик күп бит ул. Иртән йылы өйҙә, тыныс шарттарҙа, бер ерегеҙ ҙә ауыртмай уянһағыҙ, рәхмәт әйтәһегеҙме һеҙ? Әйтергә ғәҙәтләнмәгән булһағыҙ, бына бөгөндән башлағыҙ. Иҫ киткес ҡиммәтле байлыҡ ул, иң ҙур бәхет. Эшкәме, уҡыуғамы урамға сыҡҡанда беренсе осраған кешегә лә рәхмәт әйтегеҙ. Таныш булмаһа - эстән генә. Уға бөгөнгө көн шатлыҡ-ҡыуаныс, бәхет килтереүен теләгеҙ. Күңелдән генә.
Рәхмәт әйтәйек
Кешене кәмһеткән, ҡайғыртҡан, асыуландырған һүҙҙәрҙе әйтмәҫкә тырышайыҡ. Әйтергә тейеш булған урында иһә насарҙың, ямандың исемен әйтмәй генә еткерәйек. Ә рәхмәт һүҙен әйтергә оялмайыҡ. Ошо матур һүҙҙе әйтә торған кешеләребеҙ күп булһын. Кешеләргә генә түгел, ә үткән көнгә, иртән уянғанға, бөгөн эскән-ашаған ризыҡҡа, күргән, осраштырған кешеләргә, беҙҙе донъяға килтергән әсәй-атайыбыҙға, туғандарыбыҙға, хеҙмәттәштәребеҙгә рәхмәт әйтеп йөрөйөк. Хатта беҙҙе үҙ итеп бөтмәгәндәргә лә рәхмәт әйтәйек. Сөнки тап ундайҙарҙың булғанына беҙ яҡшыраҡ булырға тырышабыҙ.
Рәхмәт һүҙе яҡшылыҡҡа ҡаршы белдергән ризалыҡ, ҡәнәғәтлек тойғоһон аңлата.
Һеҙҙең дә, дуҫтар, рәхмәт әйтә торған кешеләрегеҙ, мәлдәрегеҙ күп булыуын теләйбеҙ!
