Ҡатын-ҡыҙҙар көнө

Ҡаланың әллә ни ҙур булмаған ойошмаһында ла байрамдарҙы тейешле кимәлдә үткәрергә тырышалар. Коллективҡа яңы етәксе булып Әхәт Юламанов килгәс, бигерәк тә матур үтә башланы. Элекке директор Рәмис Ғәжәпйәнович Дәүләтханов, корпоративтар һәм башҡа байрамдарҙы үткәреү өсөн аҡсаны хеҙмәткәрҙәрҙән йыйҙыра ине. Бүләк биреү тураһында һүҙ ҙә булғаны юҡ. Хәҙер барыһы ла башҡаса. Яңы йыл корпоративына махсус тамада саҡырылды. Ҡыш бабай булып кейенгән Ғәйзулла, барыһына ла бүләктәр өләште. Ватанды һаҡлаусылар көнөндә лә ир-егеттәрҙе лайыҡлы ҡотланылар. Ҡатын-ҡыҙҙар матур концерт әҙерләп күрһәтте. Таланттар ҙа күп  икән – кемдер йырланы, кемдер бейене. Ғөмүмән, шәп булды. Ғүмерҙә булмағанса, һәр ир-егеткә премиялар тапшырылды.

Бына барлыҡ ҡатын-ҡыҙҙар көтөп алған 8 март көнө лә килеп етте. Сәстәрен, биттәрен матурлап, аллы-гөллө кейенеп-яһанып килгән гүзәл заттарға был көндә маҡтау һүҙҙәрен йәлләмәнеләр. Ирҙәр ансамбле йырҙар башҡарҙы. Ҡала гәзитендә шиғырҙары сығып торған экономист Ғәлләм Саттаров "Йәшәү мәғәнәһе – ҡатын-ҡыҙҙарҙа" тигән яңы әҫәрен уҡыны. Директор Әхәт Йәүҙәт улы ҡатын-ҡыҙҙарҙың хеҙмәтен юғары баһалап, аҡсалата премия менән сәскәләр тапшырҙы.
Ошо ойошмала ғүмер баҡый иҙән йыуған, 75 йәшен тултырған Ғәшүрәне лә сәхнәгә саҡырып, ун мең аҡса менән сәскә гөлләмәһе бүләк итте. Бындай иғтибарға Ғәшүрәнең күңеле тулып илап ебәрҙе хатта. Рәхмәт әйтеп, урынына барып ултырырға йыйынған Ғәшүрә апайҙы, директор туҡтатты: "Ғәшүрә апай! Бәлки, әйтер һүҙегеҙ ҙә барҙыр",– тине ул. "Әйт тигәстен әйтәйем – һүҙен әйтеп китәйем, – тип башланы Ғәшүрә. – Әхәт ҡустым, бик ҙур рәхмәт, мине лә әҙәмгә һанап, ҙурлауығыҙға. Ошо йәшемә етеп, бүләккә кер һабыны ла биргән кеше булманы. Бер башлағас, һөйләйем әле. Мин оло кеше. Элекке директор Рәмис торғаны бер һантый ине. Кеше тикшереп, ошаҡ, ғәйбәт йыйып ултырҙы. Хеҙмәткәрҙәрҙең кейеменә хәтле бәйләнеп бер булды. Үҙе һәр ваҡыт бисәләр кеүек төҙәнеп, тырнаҡтарын игәп ултыра ине мәхлүк, ялтас баш. Ай һайын үҙенә генә премия яҙып тик барған, ти бит. Ришүәт менән тотолоп ҡыуылмаһа, һаман да ыҙалатыр ине кешеләрҙе. Һеҙҙең эшегеҙ күберәк аҡыл хеҙмәте булһа, минең эшем дә еңелдән түгел. Иртән киләм дә, арманһыҙ булып, йыуып тик йөрөйөм. Шуны ла әйтәйем әле, кешеләргә. Ашағас-эскәс, артығыҙҙан йыйыштырығыҙ әле. Юҡһа, өҫтәлегеҙҙә күпме ризыҡ тороп ҡала ҡатып. Исраф була бит. Йыйып барһаң, бер һыйыр аҫырарлыҡ.
– Ғәшүрә үҙенә һүҙ эләккәс, тағы ҡыҙҙы. – Элгәре көн генә, кәмһүтерҙә эшләп ултырған Зиннурҙың күкәйҙәрен саҡ йыуып алдым".

Халыҡ, зал яңғыратып көлөргә тотондо. Бер Ғәшүрә генә етди ине. Зиннур, помидор кеүек ҡып-ҡыҙыл булды. "С этого места подробнее, пажалыста",– тип ҡысҡырҙы Ғәлләметдин. "Ғәшүрә апай! Культурно итеп "йомортҡа" тип әйтһәң ни була",– тине бухгалтер Сафия.
"Күкәйме, йомортҡамы, яйцамы, какой разница. Фактыһы шул – Зиннурҙың күкәйҙәре һытылып, иҙән тулып ята ине. Саҡ йыйып алдым".
Бер көлә башлаған халыҡты туҡтатырлыҡ түгел ине. Ғәшүрә артабан дауам итте: "Ней бит, Зиннур эшкә килгән сағында, ауыл күкәйе тип, урамда һатып торған бисәнән бер биҙрә күкәй алған да, килгәс үҙенең эш өҫтәленә ултыртып ҡуйған. Шунан алабарман кеше, терһәге менән яңылыш төртөп ауҙарған да ҡуйған. Күкәй менән иҙән тулғайны. Бер нисәүһе генә ярылмай ҡалғайны. Башҡаса эшкә күкәйегеҙҙе тотоп килмәгеҙ, зинһар", шулай тине лә Ғәшүрә, тағы ла директорға рәхмәт әйтеп урынына барып ултырҙы.

Ҡатын-ҡыҙҙар байрамы артабан дауам итте.

Харис ШӘРИПОВ.